Mae Menter Caerffili yn falch i’w chyhoeddi bod nhw wedi derbyn nawdd o’r Gronfa Allweddol Cwm a Mynydd Caerffili i ddechrau prosiect newydd a chyffrous i greu Gŵyl Gymraeg blynyddol yng Nghaerffili o’r enw ‘Ffiliffest’.

Cynhelir yr Ŵyl eleni ar 26ain a 27ain o Fehefin yng nghanol Caerffili ar feysydd chwarae Owain Glyndŵr, Heol y Cilgant. Bydd yna amrywiaeth o weithgareddau, adloniant, cerddoriaeth a stondinau gan fusnesau lleol yn gwerthu nwyddau a chrefftau Cymreig.

Mae’r Fenter wrthi ar hyn o bryd yn gweithio gydag amrywiaeth o fudiadau a grwpiau i gynllunio’r Ŵyl. Rydym yn awyddus iawn i glywed wrth unigolion a grwpiau sydd â diddordeb mewn cymryd rhan yn y prosiect mewn unrhyw ffordd - beth am gynnal stondin neu gynnig gweithgaredd yn Ffiliffest er mwyn codi ymwybyddiaeth o’ch grŵp? Neu efallai bod diddordeb gyda’ch Côr neu’ch Band perfformio yn y digwyddiad?

Rydym hefyd yn chwilio am wirfoddolwyr i’n helpu i stiwardio ac i’n cynorthwyo i hysbysebu’r digwyddiad felly beth bynnag gallwch chi gynnig, cysylltwch â ni am sgwrs ar 01443 820913 neu e-bostiwch emilycole@mentercaerffili.org.

Gellir dod o hyd i fwy o wybodaeth am Ffiliffest yma: http://caerffili.org/cymraeg/ffiliffest.php

Cynhaliwyd Twmpath Gŵyl Dewi Menter Caerffili eleni mewn safle newydd, sef Y Gleren Werdd, ym Medwas, a daeth dros 80 o bobl, o bob cor y byd e.e. Malta, Seland Newydd ac America.

Roedd yr ystafell yn maint berffaith, gyda llawr dawnsio mawr. Roedd y tocynnau’n £5 y pen yn fargen, gan gynnwys cludiant dwy ffordd, mynediad i’r twmpath ac amrywiaeth o gaws, bara a bisgedi.

Darparwyd yr adloniant gan Ddawnswyr Nantgarw, a gychwynodd y noson gyda sawl dawns werin draddodiadol, wedyn daeth cyfle i bawb dwmpathu. Cafwyd llawer o hwyl a sbri gan bawb, a hefyd clywom enw a hanes pob dawns.

Roedd egwyl i bawb ddal eu hanadl a mwynhau caws o bob math gan gynnwys Caerffili (wrth gwrs!), Cheddar Cymreig, Brie ac eraill, cyn mynd yn ôl i’r dawnsio.

Diolch yn fawr i bawb a brynodd tocynnau. Roedd yn braf iawn i weld cymaint o wynebau newydd.

Gellir gweld mwy o luniau y Twmpath yma.

Dewch yn rhan o NEW.i.D.

Mae sioe ‘NEW.i.D’ yn delio â sut mae straeon a thraddodiadau yn cael eu hanghofio o genhedlaeth i genhedlaeth a sut mae hyn yn effeithio ar ein hunaniaeth fel Cymry.

Mae’r sioe wedi ei lleoli mewn ysbyty hudol, tanddaearol lle mae chwedlau a thraddodiadau yn mynd wrth iddynt gael eu anghofio ym Mlaenau’r Cymoedd. Yr unig beth sy’n eu cadw’n fyw yw cof llond dwrn o bobl, gofal hudol y tylwyth teg a phwerau iachau ffynnon tanddaearol. Bydd y gynulleidfa yn gweld eu byd modern mewn modd unigryw ar ddwy sgrin anferth ar bob ochr i’r llwyfan, trwy lygaid y cymeriadau chwedlonol.

Mae’r sefyllfa’n gwaethygu yn yr ysbyty hudol wrth i genhedlaethau ifancaf Blaenau’r Cymoedd gael eu geni heb cof byw o gyfnod chwedlonol y diwydiant glo, haearn a dur. Wrth i’r cymeriadau a’r traddodiadau diwydianol ddechrau llifo fewn i stafelloedd aros yr ysbyty, mae’n rhaid i’r tylwyth teg ddod o hyd i ateb ar frys. Bydd yn rhaid iddynt ddanfon rhai o’r creaduruaid chwedlonol fewn i’r byd modern i ddod o hyd i atebion.

Bydd pob agwedd o’r sioe yn cael ei ddatblygu o fewn cymunedau Blaenau’r Cymoedd o dan arweiniad Celf ar y Blaen ar ffurf gweithdai. Bydd oleiaf 2,000 o bobl o’r ardal yn cyfranu i’r perfformiad theatrig unigryw a fydd yn cyfuno drama byw llwyfan, cerddoriaeth a ffilmiau gwreiddiol, perfformwyr stryd a thafluniadau. Mae’r Cyfarwyddwyr Artistig yn cyfuno arbenigedd theatrig a pherfformio Einir Sion (Satellite City; Con Passionate) a sgiliau technegol a chreadigol y Cyfarwyddwr/Cynhyrchydd teledu Lleucu Meinir. Apwyntiwyd y Cyfarwyddwr Cerddorol uchel ei pharch Helen Woods i ddatblygu corau cymunedol, gweithdai gamelan ac ysgrifennu caneuon yn ogystal ag i gyfansoddi’r gerddoriaeth wreiddiol ar gyfer y sioe. A bydd y cynllunydd set/gwisgoedd, Suzi Dorey, sydd newydd gael ei hapwyntio yn dod â dawn greadigol unigryw i’r sioe gyda’i mîn modern.

Cysylltwch a Celf ar y Blaen am fwy o wybodaeth: info@head4arts.org.uk

Mae Cylch Llenyddol Bro Elyrch yn awr yn ei 24ain tymor, ac mae amserlen ar gyfer cyfarfodydd 2010 wedi'i threfnu. Mae'r amserlen i'w gweld yma.

Cynhelir y Cyfarfodydd yn Ysgol Bro Sannan ar nos Iau, gan gychwyn am 7:30 oni nodir yn wahanol.

Am fwy o fanylion, cysylltwch â Ben Jones 02920 862428